វៀតណាម៖ តុលាការប្រទេសវៀតណាមនៅថ្ងៃទី០៦ ខែកញ្ញាម្សិលមិញ បានសម្រេចផ្តន្ទាទោសបុរសម្នាក់ដាក់ពន្ធនាគារកំណត់ ៥ឆ្នាំ ពីបទបំពានវិធានការចត្តាឡីស័ក និងបណ្តាលឱ្យមានការចម្លងជំងឺកូវីដ-១៩ ទៅកាន់មនុស្សចំនួន ៨នាក់។ នេះបើតាមសេចក្តីរាយការណ៍របស់សារព័ត៌មានរដ្ឋវៀតណាម។

ជនល្មើសខាងលើនោះមានឈ្មោះ Le Van Tri វ័យ២៨ឆ្នាំ ត្រូវបានតុលាការប្រជាជននៃខេត្ត Ca Mau ភាគខាងត្បូងប្រទេសវៀតណាម ផ្តន្ទាទោសនៅក្នុងសាវនាការមួយពីករណី​​ "បង្កឱ្យមានការរីករាលដាលជំងឺឆ្លងដ៏គ្រោះថ្នាក់"​ ។ បើ់តាមព័ត៌មានបន្ថែមដោយសារព័ត៌មានរដ្ឋ Vietnam News Agency (VNA) បានឱ្យដឹងថា បុរសខាងលើនេះបានធ្វើដំណើរត្រឡប់មកពីទីក្រុងហូជីមិញ ទៅកាន់ខេត្ត Ca Mau និងបានបំពាននូវវិធានការរដ្ឋបាលដែលតម្រូវឱ្យមានការដាក់ខ្លួននៅដាច់ដោយឡែករយៈពេល ២១ថ្ងៃ។  Le Van Tri បានបណ្តាលឱ្យមានការឆ្លងជំងឺកូវីដ-១៩ ទៅកាន់មនុស្ស ៨នាក់ផ្សេងទៀត ហើយក្នុងចំណោមនោះមានម្នាក់បានស្លាប់ក្រោយទទួលការព្យាបាលរយៈពេលជាង ១ខែ។

គួរបញ្ជាក់ថា ខេត្ត Ca Mau ដែលស្ថិតនៅភាគខាងត្បូងប្រទេសមានវៀតណាម មានករណីឆ្លងថ្មីនៃវីរុសកូវីដ-១៩ សរុបត្រឹម១៩១ករណី និងមានអ្នកស្លាប់ ២នាក់ប៉ុណ្ណោះចាប់តាំងពីមានការផ្ទុះឡើងនូវការរាតត្បាតកូវីដ-១៩ ទ្រង់ទ្រាយធំនៅវៀតណាម។ យ៉ាងណាក្តីតួលេខនេះមានកម្រិតទាបខ្លាំង បើធៀបនឹងទីក្រុងហូជីមិញដែលជាចំណុចកណ្តាលនៃការផ្ទុះឡើងនៃវីរុសកូវីដ-១៩ ដែលមានអ្នកឆ្លងសរុបចំនួនជាង ២៦ម៉ឺនករណី និងមានអ្នកស្លាប់ចំនួន ១០,៦៨៥នាក់។

គួររំឮកផងដែរថា តុលាការវៀតណាមកន្លងមកក៏បានប្រកាសផ្តន្ទាទោសបុគ្គលផ្សេងទៀតដោយបទល្មើសដូចគ្នានេះចំនួន ២ករណី ដោយមួយករណីជាប់ពន្ធនាគារ ១៨ខែ និងមួយករណីផ្សេងទៀតផ្តន្ទាទោស ២ឆ្នាំ៕